ប៉េប៉េអឹមកម្ពុជាៈ អតិថិជនជាង ៣០០ នាក់ចូលរួមអបអរភាពជាដៃគូ «KINAL VIP» ពាក់កណ្តាលឆ្នាំ
កាលបរិច្ឆេទ: ១០ កញ្ញា ២០២៤ / សុខភាព / Author : ATH Sokren
អតិថិជនដែលជាម្ចាស់ឱសថស្ថានធំៗ ជាង ៣០០ នាក់ តំណាងឱ្យឱសថស្ថានជាង ១០០ មកពីទូទាំងប្រទេស រួមទាំងដៃគូចែកចាយធំៗទាំងបួនរបស់ប៉េប៉េអឹម បានអញ្ជើញចូលរួមក្នុង «ពិធីអបអរភាពជាដៃគូ និងភាពជោគជ័យរវាង ប៉េប៉េអឹម និងអតិថិជន «KINAL VIP» ពាក់កណ្តាលឆ្នាំ» ដែលរៀបចំឡើងដោយក្រុមពាណិជ្ជកម្ម របស់សហគ្រាសផលិតឱសថ ប៉េប៉េអឹម កាលពីពាក់កណ្តាលខែសីហា កន្លងទៅនៅក្នុងភោជនីដ្ឋានដ៏ធំមួយក្នុងរាជធានីភ្នំពេញ។
លោក តិច ស៊ីម៉ូ នាយកផ្នែកពាណិជ្ជកម្ម និងជាតំណាងរបស់លោកឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកក្រុមហ៊ុន សហគ្រាស ប៉េប៉េអឹម និងខនហ្វីរេល បានបញ្ជាក់ថា អ្វីដែលសំខាន់នៅក្នុងរាត្រីនេះ គឺចង់សម្តែងនូវការអរគុណដល់ដៃគូធំៗទាំងអស់ ដែលតែងតែគាំទ្រនូវផលិតផលរបស់សហគ្រាសផលិតឱសថប៉េប៉េអឹម ជារៀងរហូតមក។ ការសហការណ៍គ្នាបានល្អរវាង សហគ្រាស និងអតិថិជននេះហើយទើបធ្វើឱ្យយើងទទួលបានជោគជ័យទាំងអស់គ្នានៅថ្ងៃនេះ។
លោកតិច ស៊ីម៉ូ បានគូសបញ្ជាក់ថា៖ «ជំនឿចិត្ត ភាពជាដៃគូ និង ការគាំទ្រនេះហើយ ដែលជាគ្រឹះដ៏សំខាន់នៃភាពជោគជ័យរបស់យើងមកទល់សព្វថ្ងៃ។ តួយ៉ាងដូចពេលនេះដែលយើងទាំងអស់គ្នាបានជួបបញ្ហាសេដ្ឋកិច្ចមិនសូវសមប្រកបតាំងពីឆ្នាំទៅ (២០២៣) តែយើងអាចនិយាយថា ជាមួយនឹងស្ថានភាពដ៏ពិបាកនេះ ក៏យើងនៅតែអាចជំនះបញ្ហាបាន ហើយបាននាំមកនូវលទ្ធផលល្អសមរម្យមួយ។ ភាពជោគជ័យនៅថ្ងៃនេះ កើតមានមានឡើងដោយសារតែមានការរួមចំណែកយ៉ាងធំពីដៃគូពាណិជ្ជកម្មទាំងអស់ដែលមានវត្តមាននៅទីនេះ»។
លោកតិច ស៊ីម៉ូបានបន្តថា ជាមួយនឹងភាពជោគជ័យនៅសព្វថ្ងៃធ្វើឱ្យយើងនឹកឃើញដល់អតីតកាល កាលពីជិត៣០ឆ្នាំមុន ដែលលោកឱកញ៉ាឱសថបណ្ឌិតហៃ លីអ៊ាងបានបង្កើតសហគ្រាសផលិតឱសថប៉េប៉េអឹមដំបូងដែលមានទីតាំងនៅក្នុងកូនវីឡាតូចមួយនៅខណ្ឌទួលគោក។ តែដោយសារតែលោកមានទស្សនៈវិស័យធំហើយច្បាស់ណាស់ បានធ្វើឱ្យសហគ្រាសផលិតឱសថប៉េប៉េអឹម ក្លាយទៅជាសហគ្រាសផលិត
ឱសថមួយធំជាងគេនៅក្នុងប្រទេសកម្ពុជា។
មិនតែប៉ុណ្ណោះ ផលិតផលរបស់ប៉េប៉េអឹមក៏មានភាពល្អីល្បាញផងដែរនៅលើទីផ្សារអន្តរជាតិ ជាពិសេសទីផ្សារនៃបណ្តាប្រទេសអាហ្វ្រិកនិយាយភាសាបារាំងមានការគាំទ្រាំយ៉ាងខ្លាំងនូវគ្រប់ផលិតផលរបស់ប៉េប៉េអឹម ដែលធ្វើឱ្យសហគ្រាសយើងមានសមត្ថភាពប្រកួតប្រជែងជាមួយនឹងក្រុមហ៊ុនឱសថធំជាង ៦០០ ក្រុមហ៊ុននៅទីនោះ ហើយប៉េប៉េអឹមបានជាប់ចំណាត់ថ្នាក់លេខ ១៥ ក្នុងចំណោមក្រុមហ៊ុនទាំងអស់នោះ។
មុននឹងបញ្ចប់សន្ទរកថា លោកតិច ស៊ីម៉ូ មិនភ្លេចរំលឹកដល់អតិថិជនទាំងអស់ថា នៅឆ្នាំ ២០២៥-២០២៦ ខាងមុខ ប៉េប៉េអឹមនឹងមានផលិតផលថ្មីៗមួយចំនួនទៀតនឹងចេញលក់នៅលើទីផ្សារ ដែលជាផលិតផលផ្សំឡើងពីវត្ថុធាតុដើមក្នុងស្រុក និងមានការចូលរួមសិក្សាស្រាវជ្រាវដោយផ្ទាល់ពីលោកប្រធានអគ្គនាយក និងក្រុមសិក្សាស្រាវជ្រាវ និងអភិវឌ្ឍន៍របស់ប៉េប៉េអឹម។
បន្ទាប់ពីបានពិសាអាហារពេលល្ងាចរួមគ្នាយ៉ាងសប្បាយរីករាយជុំគ្នារួចមក អតិថិជនទាំងអស់ក៏មានឱកាសក្នុងការផ្សេងសំណាងជាមួយនឹងសន្លឹកឆ្នោតរបស់ខ្លួន ជាមួយនឹងរង្វាន់ជាច្រើនដែលក្រុមការងារពាណិជ្ជកម្មបានរៀបចំ។ បើតាមគម្រោងការជួបជុំបែបនេះនឹងធ្វើឡើងម្តងទៀតនៅដើមឆ្នាំ ២០២៥ នៅក្នុងរាជធានីភ្នំពេញ សម្រាប់អតិថិជននៅទីក្រុងភ្នំពេញ ខេត្តកណ្តាល កំពង់ឆ្នាំ និងកំពង់ស្ពឺ និងនៅតាមតំបន់ចំនួន ៥ ធំៗ ក្នុងបណ្តាខេត្តមួយចំនួន ដែលក្នុងនោះតំបន់កំពង់ចាម សម្រាប់អតិថិជនក្នុងខេត្តកំពង់ចាម ព្រៃវែង ស្វាយរៀង ត្បូងឃ្មុំ ក្រចេះ ស្ទឹងត្រែង មណ្ឌិលគិរី និងរតនគិរី។ តំបន់សៀមរាប សម្រាប់អតិថិជនក្នុងខេត្តសៀមរាប កំពង់ធំ , ព្រះវិហារ និងឧត្តមានជ័យ, តំបន់បន្ទាយមានជ័យ សម្រាប់អតិថិជនក្នុងខេត្តបន្ទាយមានជ័យ និងក្រុងប៉ោយប៉ែត , តំបន់បាត់ដំបង សម្រាប់អតិថិជននៅក្នុងខេត្តបាត់ដំបង ពោធិសាត់ និងប៉ៃលិន និងចុងក្រោយតំបន់កំពត់សម្រាប់អតិថិជនខេត្តកំពត កែប តាកែវ កោះកុង និងខេត្តព្រះសីហនុ៕
